عيادة المغتربين «2»
أنا الأستاذة رباب.. أخصائية نفسية في إحدى المستشفيات في دولة عربية شقيقة.. وبما إني مصرية فبيتوافد عليا كتير من المصريين طمعا في دردشة أو الفضفضة أكثر منها استشارة طبية.. وطبعا لأننا جميعا مغتربين وقصصنا وشكوانا بتدور في فلك الغربة.. فأنا أسميت عيادتي عيادة المغتربين..
كل مرة هحكي لكم قصة.. وهخليكم تشاركوا أصحابها حيرتهم وأوجاعهم.
«زوجة مدللة»
- أنا عايزة اتكلم يا دكتورة أرجوكي اسمعيني عايزة أخرج اللي جوايا.
- طب اهدي.. اتفضلي أنا معاكي وسامعاكي.
- أنا اسمي سهر.. متجوزة.. أول ما اتجوزت سافرت مع جوزي وجيت على هنا على طول.. بقالي سنتين ورغم كده لسه مش قادرة اتعود.. مش مرتاحة.. أهلي على طول بيوحشوني.. أنا أصلي بنت وحيدة وماليش غير أبويا وأمي.. هما كل حاجة بالنسبة لي.. جوايا دايما إحساس بالذنب إني سايباهم لوحدهم.
- طب وجوز حضرتك؟
- جوزي إنسان كويس جدا بس مش حاسس بيا.. شايفني على طول متدلعة ومش ست بيت شاطرة زي مامته وإخواته البنات.. شايفني على طول مقصرة.. شايف العيوب دايما قبل المميزات.. أيوه أنا بنت وحيدة وكنت مدللة في بيت أهلي.. بس أنا هنا بعمل كل حاجه بطبخ وبنظف وبغسل زي أي زوجة عادية.. بس برضه صعب اسمع منه كلمة رضا.. الشغل واخد كل وقته ولو كان في البيت فبيبقى ساكت.. بحس نفسي على طول لوحدي.. تعبت.. نفسي أنزل أعيش في مصر.
- طب انزلي.
- وأسيبه لوحده.. أخاف يتعود على كده.. ولا يتجوز عليا.. حيرتك صح؟ بس أنا فعلا مش عارفة اعمل إيه؟
- طب ما حاولتيش تعملي صداقات.. تشتغلي؟
- هو صعب قوي كل حاجه لا.. مينفعش أخرج لوحدي.. مينفعش أشتغل.. مينفعش نخرج مينفعش نتفسح.. أنا زهقت.
- طب هدي نفسك.
(طبعا طلبت إني أقابل الزوج وأحاول أوصل معاه لحل.. وده كان رده)..
- أنا مشغول.. دوامي 12 ساعة في اليوم ويمكن أكتر.. لازم تتحملني لكن للأسف هي متدلعة.. عايزة كل حاجة على مزاجها.. الكلام على مزاجها الأكل على مزاجها.. النقد ممنوع.. لو قلت حاجة مش عاجباني تبقى مشكلة كبيرة.. واقفة لي دايما على الواحدة.. إيه أنا بشر.. وبعدين إحنا عايشين هنا عشان نحوش ولا نصرف في كلام فارغ.. عايزة خروج وفسح وتروح فنادق.. بتحب تريح نفسها على الآخر.. ستات آخر زمن.. ده أنا أمي وإخواتي كانوا بيهدوا البيت تنظيف.. وبيخبزوا كمان وهي على طول زهقانة.. زهقانة.. شوفي لك حل معاها.. عقليها مش كده.
خلصت حلقتنا النهارده
انتظرونا في حلقة جديدة من «عيادة المغتربين».
جميع الحقوق محفوظة لمصدر الخبر الوطن وتحت مسؤليتة ونرجوا متابعتنا بأستمرار لمعرفة أخر الأخبار علي مدار الساعة مع تحيات موقع موجز نيوز الأخباري
