اخبار السياسه الملحن محمود الخيامي يفتح النار على تامر حسني ويتهمه بسرقة أفكاره

هاجم الملحن محمود الخيامي، الفنان تامر حسني واتهمه بسرقة أفكاره ومجهوده وذلك من خلال عرضها عبر صفحته الرسمية بموقع التواصل الاجتماعي الـ"فسبوك".

كتب الخيامي على صفحته :"لما يكون فنان المفروض إنه مشهور ونجم والمفروض إنه زميل رحلة كفاح ونفس الجيل اسمه تامر حسني ويسرق فكرتك ومجهودك وما يقدرش تعبك وتحاول تتواصل معاه على أساس إنه بيغير رقم تليفونه كل 10 دقايق يبقي ده إسمه إيه؟ لما من زمان يضرب لك أغاني عالإنترنت ويسربها وطبعا لا أنا ولا الشاعر أخدنا أجور مرة واتنين وتلاتة ده يبقي اسمه إيه؟".

وفي تدوينة أخرى كشف الخيامي عن الأغنية التي سرقها منه تامر حسني وهي أغنية كان من المفروض أن يعمل عليها المطرب المغربي فريد غنام وكتب الخيامي قائلا :"الأغنية اللي بتكلم عنها إن تامر سرق فكرتها وجزء من لحني اللي حوره عشان يقول إنه لحنه هي الديو اللي عاملها مع الشاب خالد، الأغنية دي أصلا فكرتي وتوزيع خالد نبيل والتراك عندي عالميل من 3 سنين وده يثبت حقي في الغنوة دي كانت ديو تامر مع فراولة، فريد غنام، اللي كان مع شيرين في ذَا فويس وبالفعل كلمنا الولد وللأسف تامر طلب مني أطلب من فراولة إنه يكتب على تويتر وفيس إن أمنية حياته يشتغل مع نجم الجيل العظيم تامر حسني".

وأضاف :"وبالفعل طلبت من فراولة ونفذ الولد ياعيني تامر حب يأڤور شوية  فقالي شيرين حتزعل وتقول إني أخدته منها قولتله شيرين بقالها سنة ما عملتش حاجة للولد فنجم الجيل قالي قول لفراولة ينزل فيديو عاليوتيوب بيقول إني دخلت ذَا فويس أصلا عشان تامر يشوفني ويساعدني ويدعمني على أساس إن تامر بيدعم المواهب".

وتابع :"يومين ولقيت تامر بيكلمني يقولي لو فراولة مجاش خلال أسبوع مش حنقدر نسجل وطلب مني أخلي فراولة يرفع الفيديو من اليوتيوب حسّيت بغدر من تامر فطلعت عالمجمع أقدم فيزا لفراولة على مصر وربنا سهلها وأخدت الموافقة، كلمت تامر قولتله أنا وفراولة جاهزين قالي خليه ييجي قولتله يا تامر المفروض إنت اللي تبعتله التذاكر والإقامة، المهم تامر اختفى ونزل ألبومه من غير الغنوة".