اعترافات جديدة للمتهم بقتل والديّ زوجته في المنوفية

تملكه الشيطان وأعمي بصره بالغضب وملأ قلبه بالغل والإصرار علي الانتقام الأعمى دون تفكير في ما سوف يرتكبه.. لم يفكر لحظة في مستقبل أبنائه، لم يخطر بباله أن يد العدالة سوف تطوله سريعا، فقرر الانتقام بدون رحمة وبصورة مفزعة اهتزت لها قرى مركز شبين الكوم بمحافظة المنوفية.

ارتكب محمد عبدالله البالغ من العمر 42 عاما هذه الجريمة، حيث بدأ حديثه أمام نيابة شبين الكوم وهو في حالة انهيار تام لما أقدم علي فعله وبدأ محمد حديثه قائلا: "أنا شاب زي اي حد اشتغلت وكونت نفسي وقررت اتجوز من 12 سنة وبعد البحث عن عروس، استقررت علي الزواج من بنت خالي وتقدمت لخطبتها وخالي وافق علي الزواج من بنته ومرت سنة الخطوبة واتجوزنا وبقينا عايشين زي اي أسرة يوم فرحانين ويوم فيه مشاكل زي اي بيت وربنا رزقنا بطفلين كانوا اغلي حاجة عندي في الدنيا".

وتابع: "زوجتي كانت بتغضب وتروح عند بيت أهلها كتير ساعات بكون انا اللي غلطان وأوقات تانية بيكون الغلط عندها هي وكان أهل الخير بيتوسطوا بينا ويرجعوها تاني للبيت واتعودنا علي كده، وكانت معظم المشاكل اللي بتحصل دايما علي الفلوس كانت بتتهمني اني بصرف فلوسي علي الفاضي ومش مهتم بالبيت وكان ساعات والدها اللي هو خالي بيتدخل بينا ويصلحنا علي بعض".

واستطرد قائلا: "لحد آخر مرة اتخانقنا مع بعض ومشيت من البيت راحت قعدت عند أهلها وأخدت عيالنا معاها وفيه ناس كتير توسطت بينا علشان تصالحنا لكن كل محاولاتهم باءت بالفشل في الاخر فضلت قاعدة عند أهلها كتير والعيال معاها وحاولت آخد عيالي لكن هم رفضوا حتي مكنتش بعرف اشوفهم ، لحد يوم الحادثة روحت بيتهم والغيظ والغل ملكوا اعصابي وروحت والسكين في جيب البنطلون وقعدت اتفاهم معاهم علي اني آخد العيال وصوتنا ارتفع جدا فقلتلهم تعالوا نطلع علي سطح البيت نتكلم براحتنا".

وأضاف قائلا: "طلعت انا وخالي محمد ،ع 60 سنة وبمجرد ما طلعنا السطوح قررت اخلص عليه وطلعت السكين من البنطلون وهو ماشي قدامي رحت دابحه ووقع قدامي والدم بدأ يسيل في المكان وحاولت اهرب لكن فوجئت بزوجته هدي 54 سنة طلعت ورايا وقبل ما تستغيث قمت دابحها هي كمان ونزلت بسرعة من علي السطوح قبل ما حد من البيت يشوفني وقررت اسيب البلد وامشي لكن فوجئت برجال المباحث بيهاجموني وقبضوا عليا وانا ندمان علي اللي عملته لكن مكنش قدامي حل تاني".

تعود بداية الواقعة إلي تلقي اللواء خالد ابو الفتوح مدير امن المنوفية إخطارا من العميد سيد سلطان رئيس مباحث المديرية بتلقيه اخطارا من رئيس مباحث مركز شبين الكوم بتلقيه بلاغا من أهالي قرية ميت خلف التابعة لدائرة المركز بمقتل رجل وزوجته أعلي سطح منزلهما عن طريق ذبحهما وعلي الفور تم تشكيل فريق بحث من قبل معاوني مركز شبين الكوم وتبين من التحريات أن وراء ارتكاب الواقعة محمد عبدالله زوج نجلة القتيلين وذلك لوجود مشاكل أسرية بينهما.

وتم عمل العديد من الأكمنة الثابتة والمتحركة حتي ألقي القبض عليه واعترف بارتكابه الواقعة.