شن الإعلامي أحمد شوبير هجوما عنيفا على البرتغالي جوزيه بيسيرو، المدير الفني لفريق الكرة الأول بنادي الزمالك بسبب تصريحاته عقب مباراة الفريق أمام سموحة.
وفاز الزمالك أمس على سموحة بهدف وحيد ليودع بطولة كأس عاصمة مصر بفارق الأهداف، حيث تأهل فريق مودرن سبورت برفقة بتروجت عن هذه المجموعة.
وقال أحمد شوبير، في تصريحات إذاعية، اليوم الخميس: «أنا إمبارح معجبتنيش تصريحات بيسيرو مش مبسوط منه، الراجل ده أنا شايفه مدرب كويس واستضفته قبل كده وكان كلامه جميل وعاقل، وقال لي كان نفسه يدرب في مصر، بس قصة إنه يقول ضغطونا ومش عارف إيه ده مش مبرر جيد، خاصة إنه لعب إمبارح بعدد كبير من اللاعبين الأساسيين، ولما عمل تغييرات لعب 4 ثقال جدا دفع بـ عبدالله السعيد ودونجا وأحمد فتوح ومصطفى شلبي، والزمالك كان محتاج يكسب 2-0 بس ويتأهل».
وأضاف شوبير: «طبعا كأس العاصمة هى البطولة رقم 3 في مصر، لكن كان سهل يا مستر بيسيرو إنك تكمل وتفوز بيها، وبعدين كل شوية تغيير طريقة اللعب، ده مينفعش في الوقت ده، كمان الزمالك لم يخلق الفرص وأنت خارج من الكونفيدرالية من كام يوم والجماهير كانت غاضبة».
واختتم شوبير: «لكن في النهاية كان هيبقى اسمك خدت بطولة، وبعدين فين الروح مش حلو بصراحة، وتغييراته متأخرة بشكل عام مكانش ده الأفضل منه إمبارح، وبعدين بيقول لك أنا سعيد اللاعيبة بتحارب، ده مينفعش أنت بتتكلم عن نادي الزمالك».
