وجه الإعلامي أحمد شوبير حارس مرمى الأهلي ومنتخب مصر السابق رسالة نارية إلى مسؤولي لجنة الحكام المصرية برئاسة محمد فاروق وإبراهيم نور الدين مطالبا إياهم بالتركيز والهدوء لتفادي الأخطاء وعدم حدوث مشكلات في ظل الأزمة المشتعلة منذ مباراة الزمالك والبنك الأهلي في مستهل بطولة الدوري المصري.
وقال أحمد شوبير: «بصوا هتفضلوا تسمعوا كلام كثير في موضوع طاقم تحكيم مباراة الزمالك والبنك الأهلي بس أنا بصراحة مضايق جدا من اللي بيحصل ده، معقول يا جماعة كل يوم حد من المنظومة التحكيمية في التليفزيون، أنا عايز أحل المشكلة مش فارق معايا أهلي ولا زمالك، معقول كل شوية نلاقي حد طالع، ده في بطولة السوبر في الإمارات في عز ما بيحكموا المباريات في البطولة طلعوا في التليفزيون، ومش معقولة يا جماعة كل شوية واحد منكم على الهوا كفاية اهدوا شوية عشان الدنيا تهدى كده».
وتابع أحمد شوبير: «ما عملته أن طاقم الفار بقيادة ميدو سلامة سيتم إيقافه، أما محمد عادل فلن يحكم في الجولة المقبلة وبعدها سيعود على مباريات دوري المحترفين ثم يرجع على الدوري الممتاز بعد كده».
وأضاف شوبير: «الأخطاء جزء من كرة القدم وبتحصل أخطاء في كل حتة في الدوري الإنجليزي والإسباني وعندنا في الدوري المصري، بس هنا بنخليها أهلي وزمالك طول الوقت فده خلق حالة من الاحتقان الشديد في الفترة اللي فاتت فلازم نهدى شوية وأول ناس لازم تهدى هما المسؤولين نفسهم».
واختتم حارس الأهلي السابق: «لازم يحطوا مبدأ مفيش حد يطلع في الإعلام عشان يقدروا يحلوا المشكلات خصوصا أن ما يلوح في الأفق أن لجنة الحكام الحالية عمرها قصير مع اقتراب انتخابات اتحاد الكرة الجديد».
