دافع الإعلامي أحمد شوبير حارس مرمى الأهلي ومنتخب مصر السابق عن نجم الزمالك أحمد فتوح بعد الاتهامات التي طالته في الساعات الماضية بشأن تهربه من الزمالك.
وقال أحمد شوبير في تصريحات إذاعية اليوم الثلاثاء: «تعالوا نروح شوية لأحمد فتوح عشان فتوح ياعيني ما بيسلمش واللي اتلسع من الشوربة ينفخ في الزبادي، وأنا مش عارف الحقيقة ايه سبب توجيه اتهامات جديدة لفتوح بعد غيابه عن مباراة الزمالك مع المصري».
وأوضح شوبير: «فتوح كان يعاني من نزلة برد وأيضًا عمر كمال كان غايب عن مباراة الاتحاد عشان كان عنده نزلة برد، وما نما إلى علمي إن جوميز يخطط لمشاركة أحمد فتوح في مركز الجناح الأيسر، على أن يتواجد المحترف المغربي محمود بنتايك في مركز الظهير الأيسر هو عايز يوظف الاثنين وفتوح أصلا كان جناح وتم توظيفه دفاعيا عشان مفيش حد يلعب في المكان ده».
وأضاف شوبير: «وفتوح نفسه قال ههرب ليه والنادي عارف إني كنت تعبان، هو أحنا ليه مش عايزين نساعد الناس واحد كان في محنة وربنا كرمه وعدى منها، خلونا بني آدمين شوية خلينا طيبين».
