انتقد الإعلامي أحمد شوبير حارس مرمى الأهلي ومنتخب مصر السابق، الفريق الكروي الأول بالنادي الأهلي بعد الخسارة من فرييق أورلاندو بيراتس في الجولة الأخيرة من مباريات دور المجموعات في بطولة دوري أبطال أفريقيا.
وقال أحمد شوبير في تصريحات إذاعية: «العنوان اللي أقدر أقوله هو إن الأهلاوية حائرون يفكرون يتساءلون في ذهول، ما الذي حدث للنادي الأهلي، في الدوري المصري الفريق خسر 6 نقاط من 3 تعادلات مع الاتحاد السكندري والبنك الأهلي وإنبي، وفي بطولة أفريقيا الأهلي يخسر لأول مرة منذ 27 مباراة بعد ما خسر من شباب بلوزداد وخسر من أورلاندو بيراتس الجنوب أفريقي».
وأوضح شوبير: «إمبارح مثلا في لغة الكورة الأهلي الأفضل وفريق معظمه من اللاعبين الشباب بخلاف صن داونز اللي لديه محترفين ولاعبين خبرة، وإمبارح مباراة أنت ضامن التأهل ومفيش ضغط عليك فأيه اللي بيحصل ده، هما كورتين فقط راحوا عليك ودخلوا في المرمى».
وتابع شوبير: «هتقول لي إرهاق موافقك بس أنت رجعت من كوت ديفوار ولاعبت الجونة وكسبت ومعنوياتك مرتفعة، هتقول لي إصابات موافقك بس الفريق الكبير الإصابات متفرقش معاه بالشكل ده، اه فيه جون اتلغى وفيه ركلة جزاء سليمة بس برضه مش كويس والمحصلة إن الأهلي خسر ولا شك التحكيم كان سيء سيء جدا جدا».
وأضاف شوبير: «بس رغم كل ده برضه لازم أسأل فيه أيه مع الجماهير بصراحة، ده أنت كسبان كل البطولات طب وبعدين يعني والجمهور عنده حق يزعل أنا مش فاهم، وحسين الشحات نزل وتعب وجاب جون وهى دي مبارياته، فهل كولر مثلا ضمن التأهل وقال يلعب باللاعبين الذين لا يشاركوا بس كولر عمره ما كان كده وضغط الجماهير عمره ما كان بيفرق معاه الكلام ده».
